C.J. Langenhoven Aanhalings

Liefde is nie kunsmatig nie.

~ C.J. Langenhoven

Maak jou vriendelikheid goedkoop en hou jou vriendskap duur.

~ C.J. Langenhoven

Moenie vriendskap en besigheid meng nie- jy bederf albei.

~ C.J. Langenhoven

Wie liefde verwar met sinnelikheid, sien 'n engel aan vir 'n aap.

~ C.J. Langenhoven

Deur twee dinge is my lewe vir my leefbaar gemaak; die liefde wat ek gegee het, en die liefde wat ek gekry het.

~ C.J. Langenhoven

Die gedienstige engel het gekom in 'n huis waar daar liefde was, en met 'n glimlag omgedraai, en gesê: My diens is hier oorbodig.

~ C.J. Langenhoven

Alle godsdiens is liefde, en die meeste liefde is afgodsdiens.

~ C.J. Langenhoven

Hoe korter jy jou kuier maak, hoe gouer sal jy weer genooi word.

~ C.J. Langenhoven

Om my naaste lief te hê is vir my 'n sware gebod. Met die mense daargunter kry ek dit not op 'n manier reg.

~ C.J. Langenhoven

Dis makliker om die gemeente lief te hê as jou buurman, en die hele menslike geslag as jou vrou se familie.

~ C.J. Langenhoven

As twee vriende eenmaal getwis het, kan hulle afmaak maar die vorige vriendskap kry hulle nooit weer terug nie. Buiten wanneer hulle met mekaar getroud is.

~ C.J. Langenhoven

Jy sê "ja" waar jy moes "nee" gesê het omdat jy die ander nie wil aanstoot gee nie. Maar reken hoe het hy jou aanstoot gegee met sy versoek!

~ C.J. Langenhoven

As jy nie van iemand hou nie, doen hom 'n weldaad. Daarna sal jy hom liefhê.

~ C.J. Langenhoven

Die teëspoed sif die vriende uit wat die voorspoed geoes het.

~ C.J. Langenhoven

Aan 'n nuwe wa kan jy sien of dit 'n goeie skilder was, aan 'n oue of dit 'n goeie wamaker was.

~ C.J. Langenhoven

Trek liewer vir jou vriend jou broek uit as om vir hom vir 'n baadjie borg te staan. Ander loop julle naderhand albei nakend.

~ C.J. Langenhoven

Die prys van vrede is vooruitbetaalbaar, dié van twis agterna.

~ C.J. Langenhoven

Borgskap is 'n kind van vriendskap, maar hy vermoor graag sy ouer.

~ C.J. Langenhoven

Die manteldraaier maak vriende al in die rondte, totdat hy op die end al in die rondte vyande het.

~ C.J. Langenhoven

Hoe meer tevrede 'n man met my is, hoe meer tevrede is ek met hom. En hoe gouer is ons al twee ontevrede.

~ C.J. Langenhoven

Die ware vriendskap, nou, is nie te koop nie; want vriendskap vind nie sy lus in neem nie, maar in gee.

~ C.J. Langenhoven

Die vriendskap wat jy moet koop is 'n duur artikel. Jy sal nie weer jou prys kry as jy dit van die hand wil sit nie.

~ C.J. Langenhoven

Gooi vir jou gas "tjiekorie" by die koffie en hy sal die "tjiekorie" onthou en die koffie vergeet.

~ C.J. Langenhoven

'n Man wat nie vyande het nie deug nie vir 'n vriend nie.

~ C.J. Langenhoven

Moenie by die hemel gaan soek na die engele nie, soek by die engele na die hemel.

~ C.J. Langenhoven

Afwesigheid is die vyand van liefde en die vriend van vriendskap.

~ C.J. Langenhoven

As jy regtig wil seermaak, soek iemand wat jou liefhet.

~ C.J. Langenhoven

Moenie jou vriend vergeet nie; dit sal hom seermaak. Maak jou vyand daarmee seer.

~ C.J. Langenhoven

Daar is één opsig waarin ek my dierbaarste vriend net so behandel soos my bitterste vyand. Ek steek my skande vir albe ewe sorgvuldig weg.

~ C.J. Langenhoven

Dooie vriendskap is die aas van wetsgeleerde kraaie.

~ C.J. Langenhoven

'n Skare is 'n versameling van eensames.

~ C.J. Langenhoven

Stuur jou buurman se vee skut toe en vind die skutgeld te min om vir jouself nog 'n veewagter te huur.

~ C.J. Langenhoven

Wat ek van Job die meeste bewonder is nie die geduld wat hy onder teëspoed betoon het nie, maar dié wat hom gekeer het dat hy sy drie vriende nie een vir een by die deur uitgeskop het nie.

~ C.J. Langenhoven

Koop jou wingerdstokkies van jou buurman. Jy het nie die vreemde wingerd se druiwe geproe nie.

~ C.J. Langenhoven

Dis nie reg van my buurman om te bid vir reën solank as my gerwe nog op die land lê nie. Waarom dink hy net aan sy eie belange?

~ C.J. Langenhoven

Vat al die kwaad wat jy in jou buurman sien en al die goed wat jy in jouself sien, en maak daar 'n derde mens uit. Hy sal naastenby so lyk soos elk van julle twee.

~ C.J. Langenhoven

Die wêreld die draai:
Vir die swaar wintertyd om ons lande te saai -
Of om luilekkerlewend die ploeg te laat roes,
En daarna ons vrugte of onkruid te oes.

~ C.J. Langenhoven

Stuur die luiaard na die miere en hy sal daar rondom die miere lê en hy sal hom verlustig in die vlyt en bedrywigheid wat aan die gang is. Want hy hou van werk - die luiaard: solank as dit nie hy is wat werk nie.

~ C.J. Langenhoven

Stuur die luiaard na die miere, en as hy nie te lui is om te gaan nie sal hy te lui wees om weer terug te kom.

~ C.J. Langenhoven

Kla oor die kooi as dit 'n ander is wat dit vir jou opgemaak het.

~ C.J. Langenhoven

Daar is geen luiaard wat glad nie wil werk nie. Hy verlang maar net na 'n ander soort werk as die wat hy nou moet doen.

~ C.J. Langenhoven

Dis net so moeilik om maklikheid in die ou wêreld te kry as wat dit maklik is om moeilikheid te kry.

~ C.J. Langenhoven

Die luiaard is die enigste man wat van sy slaap sal moet rekenskap gee.

~ C.J. Langenhoven

Waardeer die werk van jou vrou. Jy kan nie op die aarde 'n ander kneg kry vir dieselfde diens en dieselfde prys nie.

~ C.J. Langenhoven

Met gehoorsaamheid sal jy uit die kleinste inkomste iets oorhou; met verkwistery sal die grootste vir jou te min wees.

~ C.J. Langenhoven

Besorg jou eie boodskap en reken die moeite teen die wat die misverstand jou sou gekos het.

~ C.J. Langenhoven

As sport ons daaglikse plig was, sou ons die werk wat ons nou moet doen byderhand neem vir ons plesier.

~ C.J. Langenhoven

Die man wat vandag hierdie vak bevlieg en môre daardie wys self dat hy nie weet wat sy roeping is nie. Sy inkomste wys dit ook.

~ C.J. Langenhoven

Salomo het by 'n luiaard se akker verbygeloop. Had hy bietjie vertoef dan kon hy gebie het op die vendusie.

~ C.J. Langenhoven

Hoe swaarder 'n man aan sy goed gekom het, hoe swaarder bring hy daaraan deur.
Swaar-kry: lekkerkry; lekker-kry: swaarkry

~ C.J. Langenhoven

Daar is een goeie ding wat 'n slaaf soms koop wat vir sy baas te duur is. Die goeie ding is rus en die prys is arbeid.

~ C.J. Langenhoven

Daar is mense wat kan doen wat hulle wil, maar dit is die wat wil doen wat hulle kan.

~ C.J. Langenhoven

Ek was so besig om kanse te soek dat ek my geleenthede een vir een laat verbyglip het.

~ C.J. Langenhoven

Die ryk man het mos nie nodig om so suinig te wees nie. Maar hy is nie 'n ryk man wat suinig geword het nie: hy is 'n suinige man wat ryk geword het.

~ C.J. Langenhoven

Help jou swakke mededinger op die bene bly. As hy tot niet gaan, kom daar straks 'n sterke in sy plek.

~ C.J. Langenhoven

Ontydige vlyt is die merk van die luiaard. Dis sy verskoning vir ontydige rus.

~ C.J. Langenhoven

Ons reken ons geluk vir ons loon en ons straf vir ons ongeluk.

~ C.J. Langenhoven

Welvaart is die dogter van matigheid en die moeder van weelde.

~ C.J. Langenhoven

My swaarste pad trap ek self vir my plat, en swaarste is die wat my voete nooit vat.

~ C.J. Langenhoven

Daar is geen kuns by sukkel en geen sukkel by kuns nie.

~ C.J. Langenhoven

Die man wat ek na soek, is nie die wat die minste foute maak nie, maar die wat die meeste foute regmaak.

~ C.J. Langenhoven

En vêrder die boer wat nie saai nie sal nie misoeste kry nie, maar hy sal geen goeie ook kry nie.

~ C.J. Langenhoven

Het die daeraad lief en die dag sal jou liefhê.

~ C.J. Langenhoven

Slaap laat solank as jy jou eie baas is en daar sal 'n tyd kom wanneer 'n baas jou sal laat vroeg opstaan.

~ C.J. Langenhoven

'n Man wat oor homself baas is, is nooit die kneg van 'n ander nie.

~ C.J. Langenhoven

Dis die flukse perd wat flou word.

~ C.J. Langenhoven

Meer moeite as wat die vlytige het vir sy loon, het die luiaard verniet.

~ C.J. Langenhoven

Op die ou end werk die vlytige man vir homself, die luiaard vir 'n ander.

~ C.J. Langenhoven

In die sweet van sy aanskyn eet die Adamskind sy brood; in die sweet van 'n ander se aanskyn sy pastei.

~ C.J. Langenhoven

Leer jou ambag so goed dat jy jou altyd kan verhuur aan 'n baas wat daar minder kennis van het as jy. Dan sal jy sy baas wees.

~ C.J. Langenhoven

'n Presiese baas hou nie nalatige knegte lank nie. Die wat hy nie wegja nie loop weg.

~ C.J. Langenhoven

Maak in die somer hout bymekaar en sit in die winter by die vuur.

~ C.J. Langenhoven

Om van 'n ou ding ontslae te raak, verf hom nuut.

~ C.J. Langenhoven

Vir sy eie voordeel beklee 'n man 'n beroep; vir die voordeel van sy ewemens volg hy 'n roeping.

~ C.J. Langenhoven

'n Goeie ambagsman kry nooit sy werk na sy eie sin nie; 'n slegte kry dit nooit na die sin van sy klandisie nie.

~ C.J. Langenhoven

Elke artikel wat hy maak is 'n nuwe skoonheid waarvan hy die skepper is: dis syne en 'n ander kon dit nie so gemaak het nie, want sy siel het hy daarin uitgegiet.

~ C.J. Langenhoven

Die slegte ambagsman beveel sy werk aan; goeie werk beveel sy ambagsman aan.

~ C.J. Langenhoven

So 'n ambagsman is die gelukkigste mens op die aarde. Sy arbeid is sy lewenslus. Sy hardste werkdag is sy keurigste vakansie. Nie om die prys of die loon nie, maar om die heerlikheid van sy werk, werk hy.

~ C.J. Langenhoven

Ploeg self op die klip land en gee vir jou kneg die sagte grond. Dan sal jy jou kneg behou en jou ploeg ook.

~ C.J. Langenhoven

Moenie by die huis rondlê en jou knegte werk toe stuur nie. As jy vir jou eie belange traag is, hoe kan jy verwag dat hulle vir 'n ander s'n ywerig moet wees?

~ C.J. Langenhoven

Doen jou eie werk. Dis verveliger om te wag solank as 'n ander jou ketel kook as wanneer jy hom self kook.
Tog gaan dit gouer, wat hy is nie so spaarsaam met die hout nie.

~ C.J. Langenhoven

Om die luiaard gisteraand nie moeg was nie, het hy vannag nie gerus nie en daarom is hy vanmôre nog lui.

~ C.J. Langenhoven

Die goedkoopste manier om aan jou lewensmiddel te kom is om daarvoor te werk. Die duurste is om dit te steel.

~ C.J. Langenhoven

As jy geen stuk kennis het van die ambag waar jy 'n man voor huur nie, bekyk sy gereedskap. Hy sal nie in jou belang oppassender wees as in sy eie nie.

~ C.J. Langenhoven

Staan by die man wat by die dag werk om te sien dat hy nie te stadig is nie, en by die man wat by die stuk werk om te sien dat hy nie te haastig is nie - of huur twee, een by die dag en een by die stuk, en laat die een die ander skaam maak.

~ C.J. Langenhoven

Maak vir die man wat nie omgee nie goeie werk. Die man wat omgee sal dit by hom sien en ook by jou kom bestel.

~ C.J. Langenhoven

As jy jou werk sleg doen omdat jy jou loon te min beskou, sal jy nooit goeie werk doen nie: want jy sal nooit genoeg loon kry na jou eie sin nie.

~ C.J. Langenhoven

Ons betaal ons onwillige knegte altyd te veel, ons gewilliges altyd te min.

~ C.J. Langenhoven

Betaal 'n donkie se prys en moenie 'n perd se diens te wagte wees nie - maar jy betaal maklik 'n perd se prys en jy kry 'n donkie se diens.

~ C.J. Langenhoven

Daarom het Adam en Eva die Paradys nie gewaardeer nie omdat hy hulle niks gekos het nie.

~ C.J. Langenhoven

'n Man wat nog nooit self iets bymekaar gemaak het nie, het altyd slim planne hoedat 'n ander sy geld behoort te gebruik wat daarvoor gewerk het.

~ C.J. Langenhoven

Die geluk van die skyf is by die roer, en die geluk van die oes by die boer. Die belangstelling van die kneg moet jy toekry: jy kan dit nie huur nie.

~ C.J. Langenhoven

As ek die begeerte mog waag, sou ek dit graag so wil hê dat die engel wat my kom haal huis toe, my daar bring met die verslag: "Ek het hom by sy werk gekry."

~ C.J. Langenhoven

- Ons weg deur die wêreld, 1913

Gee my 'n man
Wat sê wat waar is
As die duiwel daar is
Wat doen wat reg is
As die regter weg is
Wat trou by sy gewete bly
As hy straf in plaas van beloning kry.

~ C.J. Langenhoven

Maar tussen hakies wil ek net dit opmerk: baie van ons voorouers het stoomharte by die ossewaens gehad; baie van ons het remskoenharte by die stoomwaens.

~ C.J. Langenhoven

Dit beteken nie altyd veel om 'n man van belang te wees nie. Die belangrikste persoon op 'n begrafnis is die dooi man.

~ C.J. Langenhoven

- Ons weg deur die wêreld, 1913

Skeur jou los van jou eie nasie af en verwonder jou dat die ander nasies nie oormekaar val om jou in te neem nie.

~ C.J. Langenhoven

Die verkwisterige man eet die vrugte van sy lewe groen op; die inhalige laat hulle sit tot hulle vrot is.

~ C.J. Langenhoven

Daar is honde wat maar net hoef te knor. Dit is die wat reeds tevore gewys het dat hulle kan byt.

~ C.J. Langenhoven

Moenie skryf om ongevraagde raad aan te bie nie. Jy weet nie of die man nie miskien te dom is om te weet dat jy slimmer is as hy nie.

~ C.J. Langenhoven

Moenie skryf om te preek nie. Jy weet nie of die man nie miskien self meer besorg is oor sy siel as jy oor joue en syne saam nie.

~ C.J. Langenhoven

Moenie versuim om jou brief nog 'n slag oor te lees nie. Miskien weet die man nie dat jy beter is as die foutjies wat jou ontglip het nie.

~ C.J. Langenhoven

Ek sê nie al die suur mense is fariseërs nie. Maar naastenby al die fariseërs is suur. In alle geval, solank as hulle onthou om fariseërs te wees. Want dis ook 'n inspanning.

~ C.J. Langenhoven

Verbeel jou 'n wêreld sonder skaterlag, sonder eens 'n glimlag. 'n Hemel op aarde, sal die fariseër sê. Uit so 'n hemel sou ek wegloop hel toe.

~ C.J. Langenhoven

Die toets van 'n man is, hoeveel daar nodig is om hom te laat lieg.

~ C.J. Langenhoven

Waar is die waarheid. Ja, waar is hy, dis waar. Maar waar is hy?

~ C.J. Langenhoven

Bly spaarsaam opdat jy die vermoë mag behou om vrygewend te bly.

~ C.J. Langenhoven

Daar is mense wat hulle oë so knaend daarbo op die Hemel gevestig hou dat hulle nie sien hoe min goed hulle hande hieronder op die aarde doen nie.

~ C.J. Langenhoven

Leen jou ore uit aan iedereen wat 'n tong het, maar moenie jou tong uitleen aan iedereen wat ore het nie.

~ C.J. Langenhoven

Doen wat reg is en maak die Voorsienigheid aanspreeklik vir die gevolge - in plaas van, soos nou, te maak soos jy lekkerkry en die Here die skuld te gee van die gevolge.

~ C.J. Langenhoven

Beny 'n man sy spaarsaamheid en sy volharding en jy hoef hom nie sy onafhanklikheid te beny nie.

~ C.J. Langenhoven

Die geveinsde man doen soveel moeite om die deug na te aap dat 'n mens jou verwonder waarom hy nie sommer meteens die egte artikel aanskaf nie.

~ C.J. Langenhoven

Om af te breek is geen kuns nie. 'n Klein babetjie kan 'n blommetjie verniel wat dit 'n God gekos het om te maak.

~ C.J. Langenhoven

Om te luister na 'n gesprek wat vol vloekwoorde is, is net soos om te kou aan 'n mondvol koring wat vol klippe is.

~ C.J. Langenhoven

Frisgewaag is half gewonne: maar dis maar die eerste helfte.

~ C.J. Langenhoven

Moenie 'n man help wat homself kan help nie. Jy maak hom hulpeloos vir die toekoms en jy vermors die hulp wat jy vir 'n werklik behoeftige moes gespaar het.

~ C.J. Langenhoven

Ons glo aan die vreemde profeet omdat al wat ons van hom weet goed is. Dit moet goed wees, want ons hoor dit van hom self.

~ C.J. Langenhoven

Die man wat ál dae lekker kos het, eet nooit lekker nie; en die man wat heeljaar vakansie hou, het geen één rusdag nie.

~ C.J. Langenhoven

Voordat jy 'n nuwe koers inslaan, bereken eers of jy weer sal kan omdraai as jy jou altemit vasloop, en onthou geen pad is na weerskante toe afdraand nie.

~ C.J. Langenhoven

Die man wat sy saak gewin het, beskuldig nie die regter van partydigheid nie.

~ C.J. Langenhoven

'n Man wat sy toevlug tot 'n leuen moet neem, vind dikwels uit dat hy in 'n huis gaan skuil het wat nie 'n agterdeur het nie.

~ C.J. Langenhoven

Waar die moeilikheid so groot is as 'n berg, klim die wyse bo-oor, die dwaas graaf 'n tonnel onderdeur en bly binne vassteek; die lafaard draai om.

~ C.J. Langenhoven

Die enigste tyd wanneer gespaarde geld niks werk is nie, is wanneer jy 'n goedkoop artikel gekoop het.

~ C.J. Langenhoven

Skat jou bekwaamheid te min om mee te spog en jou karakter te hoog om mee te speel. Op die manier sal jy jou selfrespek bewaar en die respek van jou ewemens verseker.

~ C.J. Langenhoven

Berou is 'n ewigdurende rente op 'n skuld waarvan die kapitaal nooit vereffen kan word nie.

~ C.J. Langenhoven

Ek het baie paaie geloop op die ou wêreld en ek weet van meer wat ander mense probeer het; maar op die ou end weet ek nie van 'n ligter pad as die regte nie.

~ C.J. Langenhoven

Hoe min mense sou te veel drink as die hoofpyn in die prop was in plaas van in die boom van die bottel.

~ C.J. Langenhoven

Hoe meer waarheid daarby is, des te gevaarliker is 'n leuen. Die oneerlike melkboer sal niemand bedrieg as hy die bottels vol skoon water maak nie.

~ C.J. Langenhoven

Aanneemlikheid en waarskynlikheid is die lewensbloed van 'n leuen. 'n Leuen wat uit die staanspoor uit nie geglo word nie is 'n doodgebore duiweltjie.

~ C.J. Langenhoven

Die meerderheid is reg, die minderheid opreg.

~ C.J. Langenhoven

Behandel jou meerdere met beleefdheid omdat dit jou plig is; jou gelyke omdat dit jou plesier is; jou mindere omdat dit jou voorreg is.

~ C.J. Langenhoven

Hoe min opinies sou daar in die wêreld gewees het as ons almal die moeite moes doen om eers 'n saak te verstaan en dan te beoordeel!

~ C.J. Langenhoven

As iemand se kritiek oor my werk gunstig is, doen ek nie die moeite om te ondersoek of hy 'n bevoegde beoordelaar is nie.

~ C.J. Langenhoven

'n Mens bie in die begin omdat jy die artikel wil hê. Naderhand bie jy omdat die ander hom wil hê.

~ C.J. Langenhoven

Gaan die geregshof gewapend met geregtigheid. En met goeie getuie en 'n knap advokaat.

~ C.J. Langenhoven

Jy eet aan jou eie tafel lekker omdat jy weet hoe dit in die kombuis toegaan. Aan die vreemde, omdat jy dit nie weet nie.

~ C.J. Langenhoven

As jy nie wil inhou nie moet jy naderhand uithou; en as jy nie kan aanhou met teëhou nie moet jy maar tevrede wees om op te hou met byhou.

~ C.J. Langenhoven

Moenie huil oor die kwaad wat jou vyand jou aangedoen het nie. As jy hom nie kan laat huil nie, moenie hom laat lag ook nie.

~ C.J. Langenhoven

Jy mag nie kan kies tussen jou vyand se haat en sy liefde nie, maar jy kan kies tussen sy haat en sy minagting.

~ C.J. Langenhoven

Die na-aper is nie eens 'n aap nie, want die aap is sommer self 'n aap.

~ C.J. Langenhoven

So wie geleer het om vas te trap, het daarby geleer om nie op sand te staan nie.

~ C.J. Langenhoven

Doen wat reg is en jy sal baie stampe kry, maar nie in jou gesig nie.

~ C.J. Langenhoven

Nederigheid kan nooit val nie.

~ C.J. Langenhoven

Hoe weelderiger woord hoe skraler gedagte.

~ C.J. Langenhoven

Om doeltreffend te lieg, moenie die waarheid heeltemal omdraai nie: hou hom skuins.

~ C.J. Langenhoven

Rek die waarheid en jy doen aan hom te kort.

~ C.J. Langenhoven

Ek neem nie die papier kwalik dat hy geduldig is nie, maar die leser.

~ C.J. Langenhoven

Daar mag halwe eiers wees wat beter is as leë doppe: maar die halwe eiers wat na my koers toe gekom het, was nog altyd vrot.

~ C.J. Langenhoven

Dis waar daar is nie rook sonder vuur nie: maar hoe meer rook hoe minder vuur.

~ C.J. Langenhoven

Afguns is ongegunde hulde.

~ C.J. Langenhoven

Om van my hoogmoed ontslae te raak het ek nederigheid aangekweek, en daarop hoogmoedig geword.

~ C.J. Langenhoven

Met 'n man wat met homself tevrede is, is niemand anders tevrede nie.

~ C.J. Langenhoven

Die man wat agter sy eie goed kyk, sal nie sy buurman s'n vat nie.

~ C.J. Langenhoven

Kleinserigheid is die voorkant van seerkleinigheid.

~ C.J. Langenhoven

Die kontant betaler is baas van sy sak.

~ C.J. Langenhoven

Die waarde van die koelte is in die warm son rondom hom.

~ C.J. Langenhoven

Die afdraande van die heenreis is die opdraande van die terugkoms.

~ C.J. Langenhoven

Sonder net daardie één soort rusies waar weerskante gelyk het, sou daar vrede op aarde wees.

~ C.J. Langenhoven

Maak staat op die raad van die man wat twyfel of dit reg is: die man wat nie twyfel nie het die saak maar van een kant af beskou.

~ C.J. Langenhoven

Draai jou verkyker om om jou buurman se foute waar te neem, en hy sal van die ander kant af daardeur kyk en jou deugde vergroot sien.

~ C.J. Langenhoven

Die preke wat die meeste indruk op ons maak, is die wat ons die minste nodig het. Hulle maak die indruk omdat hulle ons op die soort kwaad wys waarvoor ons uit ons eie die gevoeligste is.

~ C.J. Langenhoven

Die man wat die kosbaarste ware het, loop die minste daarmee te koop. Op hierdie reël is die tong geen uitsondering nie.

~ C.J. Langenhoven

- Ons weg deur die wêreld, 1913

Maar die bloemlesing-skêr-en-gompot-literateurs...Ek sien nie waarom ek hulle behulpsaam moet wees by hulle werk met potte en panne - hulle eie gompotte en ander mense se harsingspanne - en by hulle gebruik om to get rich quick deur te maai waar hulle nie gesaai het nie.

~ C.J. Langenhoven

- Aan stille waters, 1930 en 1941

Om dood te gaan is geen kuns nie: die slegste kry dit reg. Om te lewe is 'n kuns: die beste kry dit nie goed reg nie.

~ C.J. Langenhoven

- Ons weg deur die wêreld, 1913

Ons is almal op sterwe na dood.

~ C.J. Langenhoven

- Ons weg deur die wêreld, 1913

Sal die leser wat by hierdie plekke kom, as die skrywer in die graf is, onthou dat daar vir hom ook 'n jaar sal kom waarvan hy nie die Ou-jaarsdag sal sien nie.

~ C.J. Langenhoven

- Ons weg deur die wêreld, 1913

Met spaarsaamheid sal jy uit die kleinste inkomste iets oorhou, met verkwistery sal die grootste vir jou te min wees.

~ C.J. Langenhoven

Moenie 'n ander beskuldig dat hy sy oë oopgehou het onder die gebed nie; hy het maar net gekyk of joue toe was.

~ C.J. Langenhoven

- Ons weg deur die wêreld, 1913

Prosedeer oor 'n baadjie en hou jou broek klaar vir die onkoste.

~ C.J. Langenhoven

- Ons weg deur die wêreld, 1913